MOMIX: ALICE

Ilusioa, akrobazia, magia eta fantasia ezin hobeto nahastuz, MOMIXek ikusleei hegan eginarazten die untxi-zuloan zehar, ALICE izeneko Moses Pendletonen sorkuntza berrian. Literatura unibertsaleko istorio ezagun, bitxi, entretenigarri eta magikoenetako baten moldaketa pertsonal eta guztiz askea da: Lewis Carrollek 1865ean argitaratutako Alizia herrialde miresgarrian istorioaren moldaketa.

Etengabeko eraldatze-prozesuan dagoen Alizia bat erakusten digu ALICEk, muga zehatzik ez duen gorputz bat, hazi, uzkurtu eta berriro hazten dena, magiaz eta efektu bisualez betetako dantza batean. MOMIXen birmoldaketa honetan, Pendletonen dantzariek gorputzak hedatzen dituzte, euskarrien, soken eta beste dantzari batzuen gorputzen laguntzarekin, irudi, ilusio, musika, tramankulu eta Phoebe Katzinek sortutako jantzi bikain eta liluragarriz osatutako sekulako erakustaldia lagun dutela. MOMIXen produkzio guztietan bezala, inoiz ez da jakiten zer gertatuko den. Publikoak, bidaia magiko, misteriotsu, dibertigarri eta xelebre batean murgilduz, hori guztia eta askoz gehiago ikusiko du.

Fair Saturday

Arriaga Antzokiak Fair Saturday ekimenarekin bat egingo du aurten ere, azaroaren 30ean, larunbatarekin. Egun horretan, hainbat hiritako artistak, kultur erakundeak, taldeak eta espazioak elkartuko dira, izaera kultural eta sozialeko mugimendu global bat osatuz, eta ekitaldi bakoitzarekin GKE edo proiektu sozial bat babestuko dute. Horrela, larunbateko Aliceren emanaldiak -17:30ean eta 21:30ean- Fair Saturdayko jarduera ezberdinen parte izango dira eta funtzio horretan bildutako diruaren zati bat ADELA BIZKAIAri emango zaio, 1997an sortu eta ADELA EUSKAL HERRIA (ADELA E.H.) Alboko Elkarteen Federazioan (ADELA E.H.) integratutako irabazi asmorik gabeko elkartea. ADELA BIZKAIAren eginkizuna da ELAk eragindako pertsona guztien bizi-kalitatea hobetzea, baita haien senideena eta haien hurbileneko testuinguruarena ere. Gaixotasunaren prozesuan zehar, egunerokotasunean, lagundu nahi die, sufrimendua arintzen saiatuz eta haien esperientzia, baliabideak, proiektuak eta hurbiltasuna erabiliz, bizitza duina ematen laguntzeko. Bere lan-programa kaltetuei eta haien senideei zuzenduta dago, baina osasun-profesionalak, erakunde publikoak, gizarte-eragileak eta, oro har, gizartea sentsibilizatzera bideratutako proiektuak ere bultzatzen ditu, Alboko Esklerosi Amiotrofikoa (ELA) pairatzen dutenen errealitate soziala ezagutu dadin.