ORAINDIK, ORAIN ETA ORAINGOZ

Kantu bila joan, eta kantuek harrapatzen dute Jon Basaguren musikaria eta antzera gertatzen zaio Iñigo Astiz idazleari ere: poemak harrapatzen saiatu, eta poemek harrapatzen dute bera. Beren azken disko eta liburuetako abesti eta poemak eskaintzearekin batera, sorkuntzari eta orainaldia harrapatzeari buruzko hainbat gogoeta tartekatuko dituzte emanaldian.

Errezitaldi kontzertatua edota kontzertu errezitatua izango da? Egile bien dotorezia ezagututa, hitzordu ederra aurreikusi daiteke. Jon Basagurenen ibilbidea oparoa da musikari bezala, bere Izaki Gardenak proiektuak erakusten duen bezala, non popa, folka, amerikana eta bestelako estiloak maisuki lantzen dituen. Iñigo Astizek, berriz, testuak sortzeko gaitasun paregabea erakutsi du. Azken hamarkadan liburu ugari argitaratu ditu, poesiari lehentasuna emanda, eta baita sari garrantzitsuak jaso ere (Lauaxeta saria, Euskadi saria…). Gutxi balitz, kulturari alderdi desberdinetatik eusten dio, sortzaile gisa eta baita ere gertatzen denaren kontalari bezala, Berria egunkariko kultur-kazetari lana betetzen baitu.

Arriaga Antzokiak Bilboko Udalaren Euskara eta Hezkuntza Sailaren lankidetzaz sustatutako ekimena.