NEOMAK

Sarrerak salgai ekainaren 19an goizeko 11:30etik aurrera.

Neomak taldeak bere bigarren diskoa aurkezteko kontzertua eskainiko du Arriaga Antzokian. Taldekideak neskatilak zirela hasi ziren, trikitixa-txapelketetan elkarrekin lehian. Ostean, Kepa Junkeraren gidaritzapean, «Sorginak» izan ziren sei urtez. Etenaldi baten ondoren, konturatu ziren sugarrak bizirik zirauela, eta euren proiektua sortu zuten, ilusioz beteta: Neomak. Ibilbidea meteorikoa izan da. 2022ko udan argitaratutako bi abestiekin kontzertu ugari eman zituzten Euskal Herri osoan zehar, eta, irailean, lehen diskoa kaleratu zutenean, Estatuko hainbat tokitara eta Frantziako hainbat hiritara iritsi ziren. AIE (Artistas en Ruta) zikloan eta WOMEX jaialdian hautatu zituzten, Hego Korean eta Japonian zehar ibili ziren eta Boisen (AEB) egiten den Euskal Diasporaren Jaialdian hartu zuten parte.

Neomak emakume gazteak dira, eta ezarrita dagoena haustera eta ikusleen erraiak nahastera datoz. Lehen diskoarekin euskal antzoki nagusiak bete zituzten eta Arriaga Antzokiko publikoa dantzan jarri zuten. Bigarrena 2025eko udazkenean merkaturatuko dute, eta 2026. urte-hasieran gozatu ahal izango dugu euren zuzeneko berriaz.