Ballet de la Ciudad de Sâo Paulo

Balé da Cidade de Sâo Paulo taldea, 2009an Arriagara etorri zenean publikoa txalo-zartaka jarri zuena, berriro dator gure oholtzara lau koreografiaz osatutako egitarau oso interesgarri batekin.

Balé da Cidade de Sâo Paulo munduko metrópoli handienetako bateko konpainia ofiziala da eta, Sâo Paolo hiriak bezala, oso nortasun kosmopolita du. 1968ko otsailaren 7an sortu zen dantza klasikoko konpainia bezala, baina gero, 1974an, Antonio Carlos Cardoso, Iracity Cardoso eta Marilena Ansaldiren zuzendaritzapean, taldea dantza garaikidera lerratu zen, eta bide horri eutsi dio gaurdaino.

Balé da Cidade de Sào Paolo konpainiarennazioarteko ibilbide arrakastatsuaren lehen urratsa 1996an eman zen, Frantziako Lyongo Dantzaren Biurtekora gonbidatua izan zenean. Ordutik hona Europan barrena egin duten bira guztietan kritika espezializatuaren eta publikoaren laudorio bizienak jaso dituzte. Une honetan konpainiak koreografo garaikide handienek sortutako lanen errepertorio itzela dauka.